رئيس مجلس الادارةمروة حلمي
رئيس التحريرأحمد يوسف

ستات بيتنا

ستات بيتنا

ستات بيتنا
بقلم . طارق السيد
ستات بيتنا دول ريحانتنا
وغقد النور اللي في حتتنا
أدب ولطافة و ذوق وظرافة
وربنا يغفر لنا كدبتنا
أنا إسم جنابي الست حنان
من سكان الدور الأرضي
قالوا عليا تخينة عشان
زي الهجمة في طولي وعرضي
وجوزي كذلك عبده السالك
يوم ماتقوم العاركة مابينا
تلقوا خراب ودمار ومهالك
عفش البيت مابيسلم منا
يديني بوكس أظرفه شلوت
يتحول دوغري لكتكوت
يرمي عليا بخور ويقول
أشتاتا منك أشتوت
وأنا إسمي الست عديله
الساكتة في أول دور
أنا نغشة وخفة وحيلة
وجوزي عايش في الدور
يحلاله يثبت ذاته
وخصوصا نص الليل
يبرم لي في شنباتي
ويقوللي أنا سبع الليل
أرد وأقوله تمام
أنا جاية ومش هتأخر
أدخل ألاقيه كدا نام
بيخنفر ويشخر
أديله زغدين في جنابه
ولا جوزين إقلام
ولا أقص شنابه
وأتعجب أقول ياسلام
فاكراك سبع الليل
أتاريك فرد نعام
جايلي مهدود الحيل
تبرم شنبات وتنام
وأنا إسمي الست سميحة
وساكنة الدور الثاني
أبيحة قوي وتلقيحة
وأقلب ع الوش التاني
ندابة قوي ونبارة
أرقع بالصوت حياني
تسمعة كل الحارة
و الشق الجواني
والنايم جوه مغارة
يصرخ ويقول يا وداني
ودا طبعي وأنا أعمل إيه
جوزي معودني عليه
عينه زايغة قوي وهلاس
تندب رصاصة ف عينيه
وأنا إسمي الست عزيزة
وساكنة الدور التالت
دمي خفيف ولذيذة
عيبي بس لساني الفالت
لما انا جوزي يقوللي
عايز لحمة و تورلي
مع فرخة ودكرين بط
أرد وأقول ياحليله ياحلوللي
تديني خمسة جنيه وتقوللي
إن سيادتك عايز تاكل
لحمة وفرخة وبط وتورلي
تحب أجيب لسيادتك وز
وحمام محشي فريك أو رز
رد ياسبع برومبا وقوللي
أدي ستات بيتنا المحظوظ
وأدي أجوازهم بالجلوكوز
وأدي البيضة وأدي اللي سلقها
وأدي المسرح والأراجوز

Facebook Comments

أخبار ذات صلة

شارك برأيك وأضف تعليق

إحصائيات المدونة

  • 985٬629 الزوار
جميع الحقوق محفوظة لجريدة اليوم الخامس 2019 ©