رئيس مجلس الادارةمروة حلمي
رئيس التحريرأحمد يوسف

مصيـر محتـوم

  • الشعر
  • 17 سبتمبر 2019
  • 91 مشاهدة
مصيـر محتـوم

بقلم : الشاعر رضا ابو الغيط
متابعة : مسعد سليم

الليل بيفرق أحزانه
ع الناس بالكوم
وبيسرق م الفرح مكانه
وف ايده
كان ماسك شوم
للى هيتكلم أو يطلب
حقه المهضوم
وانا واقف ف الركن الهادى
وبنادى ع الخلق تقوم
وتصحى الشمس اللى ماشافت
بعيونها النوم
تغزل بشعاعها اللى بيضوى
للعِرى هدوم
تستر أبدانها اللى بتشكى
وضناها اللوم
وبااشوف
من خرم الباب المتسنكر
بأقفال الخوف
أقدام الشمس بتتحرك
خطوه لقدام
لكن بشويش
لطريق الطير المتسند
على قش وريش
وضعيف بيوارب من خوفه
م الدنيا الشيش
وجعان كان واقف يتحسر
من ناس بتبعتر ف فلوسها
وتقول بقاشيش
ويتيم مش لاقى الحنيه
وللا حُضن بلاد الحريه
ف زمان مستخسر ف الفقرا
فتافيت العيش
علشان ما تعيش
وتشوف العيد اللى هيطرح
من حُضن الصوم
ولكنى الشمس المكسوفه
بتخاف م الليل
ولهيب الويل اللى بيحرق
حلم المظلوم
وتقول يانهار
قربت أنهار
من صمت الناس اللى بتشبه
أسراب البوم
فوق شجر السنط المتغطى
بسحاب وغيوم
ومناها الليل يفضل عايش
والضلمه تدوم
ونًام ونقوم
على صوت الهم اللى بيتطرح
أحزان بالكوم
ومصير محتوم !!!!!!!

Facebook Comments

أخبار ذات صلة

شارك برأيك وأضف تعليق

إحصائيات المدونة

  • 978٬386 الزوار
جميع الحقوق محفوظة لجريدة اليوم الخامس 2019 ©