رئيس مجلس الادارةمروة حلمي
رئيس التحريرأحمد يوسف

نــــــــــــــدا قلـــــــــبي

  • الشعر
  • 04 مارس 2019
  • 479 مشاهدة
نــــــــــــــدا قلـــــــــبي

عادل التعلب

١٤ فبراير ٢٠١٩

نـــــــدا قلبي نـــــــده ليكي

مجرد بس ما شافك

بقا يصحي علـــــي عنيكي

ونام يحلم بأوصافك

ويتخيل ويتــــــمني

معاكي هيه دي جنة

وهاهتف طول ما انا عايش

يدوم عدلك وانصافك

 

يا أجمل صدفه صادفتني

أنا شــــــاكر لأفضالك

دا انا اللي الدنيا شغــلتني

هاسيب الدنيا وافضالك

أنا اللي عنيكي أسرتني

هاكمل حرب ف نضالك

يا إما تحسي إحساسي

يا إما هامد في وصالك

 

 

تقولش عنيكي فيـــهم سحر

بنظرة قلبي قال عـاشق

وضحك الشفه مــوج البحر

لشوشتي فيها انا غارق

ومين يشرب كاسات السگر

ويبعد تاني ويفــــــارق

يا صدفة ألف ملـــيون شكر

وألف معاد ماعاد فارق

 

ندا قلبي بأعـــــــــــلي الصوت

وقال قلبك هايسمعــــني

مانيش عــــــايز حياة ولا موت

مدام جواكي هايسعـــني

وليه يقتل مشاعري سكــــــوت

مدام كتمانها واجعــــني

وليه هارضي ان عمري يفوت

مدام في أديك ترجعني

 

نــــدا   قلبي  صرخ ما  تفوق

وشوف الصورة معــدولة

دا كله  بمعـــــني واحد  شوق

دا  كله  بنظرة   معقـولة

وانا  بعيني  بشــــــوفك  فوق

وآخر  واحدة  والأولـي

دي دم بيجري جــــوه عروق

ونبضة لسه سنة أولــي

 

صرخت في قلـــــبي قولتله

وأيه الشجرة غير بذرة

ونظرة لقــــــــلب تحــــــتله

وأيه الحب غير نظــرة

جيوش أشواق بتـــــــوصله

فيوصل أمسه مع بكرة

لحد السهد مــــــــــــا يـذله

ويصبح في الهوى ذكرى

 

فبص القلب واتـــــــنهد

وقاللي وانت أيـه غاصبك

ماتسترجل كدا وترفض

وسيبك بس من عـــــاجبك

وخد بعضك كدا وابـعد

هاتعرف يومها مين حابك

دا من غير حتي انا ما افرض

هايبقا الحكم من قلبك

 

فقلت لقلبي انا مغصوب

وكل ما فيا غاصبني

انا مني بقيت مسلوب

وحتي القلب راح سابني

دا مين شافها وقال راح اتوب

ياريت ييجي يحاسبني

ولو هيه قدر مكتوب

أنا مؤمن مدام صابني

 

فقالي وقعت … استحمل

وأوعي تاني تشــــــــــكيلي

وعيش حبك كدا وكــمل

هاتيجي في يوم وتحـــكيلي

ساعتها أوعي تتـــــجمل

وتركب أعلي من خـــــيلي

هاقولك يومها دي أجـمل

نجمة مــــــــــــــنورة ليلي

Facebook Comments

أخبار ذات صلة

شارك برأيك وأضف تعليق

إحصائيات المدونة

  • 927٬748 الزوار
جميع الحقوق محفوظة لجريدة اليوم الخامس 2019 ©