الشعر

الحقــــــــيقة

الشاعر / محمود السيد 

عشان الموت مالوش مواعيد

بيجي تملي وبيرحل بلا استئذان

ولا بيفرق معاه يوم عيد

ولا حتى زمان ومكان

ولا بيعرف قريب وبعيد

ولا بيصعب عليه إنسان

ولا بيرحم عزيز قومه

ولا بيعتق فقير عدمان

ولا راجل كبير في السن

ولا عيل رضيع بيأن

ولا بيحن .. للعاجز ولا لجريح

معاه تصريح …

يطوف الأرض مشرقها ومغربها

بأمر الواحد الديان …

توفى إلى رحمة الله

الشاعر #محمود_السيد

الف رحمة ونور عليه

في الـ صدق .. واللي كدّب

واللي رافض واللي آييد

واللي مش قادر يحدد

واللي قال اتصلوا بيه .

قالوا فعلا مش إشاعة

والخبر فعلا أكيد

في الـ كان زعلان عشاني

واللي بان فرحان سعيد 😂

واللي مَيّل قال لصاحبه ..

كان أناني يحب ذاته

والنداله شيء في طبعه

والغرور أكبر صفاته

بالسلامة غار في داهية

هو أحسن مـ اللي ماتوا ؟؟

قالوا عني مش كويس

عاش حياته وكان لئيم

واللي قالوا عني طيب

واللي قالوا #بتاع_حريم

رد واحد قال كفايه

ربنا ستار حليم …

قام منادي بعلو صوته

قال يا عالم وحدوووه

والله محمود كان حنَيِّن

يلاَّ بالخير اذكروه

هو بين أيد اللي خلقه ..

مات خلاص مش هتشوفوه

مين هايجي معانا بيتُه

لاجل ما نصَبّر أبوه ؟؟

في اللي وافق .. واللي كسل

واللي نافق .. واللي مثل

واللي كان واقف يسجل

والفضول تحته وفوقيه

راحوا بيتنا وشافوا ابويا

والدموع ماليين عينيه

قاموا قالوا يا (عم سيد)

الدموع هتفيد بإيه ؟

شد حيلك وادعي لابنك

ربنا بعفوه يجازيه

شافوا ابني كان بيلعب

صورتي كانت بين إيديه

كل واحد مد إيده

لاجل ما يطبطب عليه

والبنات واقفين حزانه

مش فاهمين أصلاً في ايه !!

قال اخويا وكان بيبكي

شدوا حيلكم غسلوه

رشوا مسك وريحه حلوة

جوا كفنه وجهزوه

واوعوا تنسوا فـ يوم صاحبكم ..

كل فترة ابقم زوروه .

والغريبه انا كنت ميت

بس سامع كل حاجه

كنت شايف كل حاجة ..

كات بتحصل بالدقيقة

والوشوش بانت قصادي

مين خبيثه ومين بريئه

شفت ناس عمالة ترسم

حزن لكن بالطريقه

وبصراحة انا كنت باحلم

وأما فقت لقتني باندم

هو حلم بجد لكن ..

شفت فيه كلَّ الحقيقة .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى