حواررياضة

” محمد هاني ” .. جناح الأهلي الطائر .. في ضيافة اليوم الخامس

حوار من القلب عن مسيرته وأهم تصريحاته وأمنياته في المستقبل

عادل التعلب

 

 

أهم تصريحات هاني

 

*صنعت أسيست لعماد متعب في أول لقاء مع الأهلي أمام الإتحاد واحرز منه هدف

*مع احترامي للكابتن أحمد فتحي هابذل قصاري جهدي علشان جمهورنا ميحسش بغيابه

*كنت أتمني ألعب مع تريكه وبركات

*رسالة هاني لمؤمن زكريا ومحمد صلاح

*أتمني احترف في الدوري الأنجليزي

 

 

لاعبون متمسكون بالفنلة الحمراء رغم المغريات ، ولاعبون تركوها احترافا ، وبحثا عن وجهات أخري ، ربما تعلوا القاعدة الكبري بأن الأهلي بمن حضر ، وبأن الأهلي لم يتأثر بالغيابات أياُ كانت ، إلال أن بعض المراكز التي حفرت في ذاكرة مشجعي الأهلي كالباك الأيمن والذي ظل الجوكر فيه طيلة سنوات عديدة مما أثار حفيظة بعض المشجعين وقلقهم فور إعلان رحيل فتحي لنادي بيراميدز مع نهاية الموسم ، وتناسي الجميع أن هناك جناح طائر رائع يطير علي بمحازاة خط الملعب مثل الفراشة ويتسارع بدفع الكرة بخفة الغزال ويقدم مردود رائع في كل اللقاءات التي خاضها هو ابن الأهلي الكابتن ” محمد هاني ”

 

حيث التقت اليوم الخامس بالكابتن هاني في حوار مفتوح من القلب مع الخلوق المحترم ابن النادي …

 

 

** جمهور الأهلي بيسألك .. مين محمد هاني ؟

 

*محمد هاني جمال من مواليد  25 يناير 1996 في القاهرة ، متزوج .

 

 

** متي بدأت لعب كورة القدم ؟ .. احكيلنا عن بدايتك ..

*في سن 11 سنة في النادي الاهلي وصعدت فريق اول في سن 18 سنة وفي 2016 بدأت مشاركتي مع المنتخب المصري ، تحت 23 سنة المنتخب الاوليمبي وبعدها المنتخب الاول .

 

 

** مين اول حد خد بأيدك وتنبأ ليك بالموهبة ؟

*والدي وله الفضل ف ذلك .

 

 

** مين أول مدرب ضمك للفريق الأول بالنادي الأهلي ؟

*كابتن محمد يوسف ، و كابتن حسام البدري من بعد .

 

 

** لو فاكر اول مباراة لعبتها بعد تصعيدك للفريق الأول كانت ضد مين ؟ والنتيجة كانت ايه ؟

*الاتحاد السكندري اول ظهور ليا و نتيجة المباراه 3/1

 

 

** كان ليك اسهامات بارزة في اللقاء ؟

*عرضية الجول التاني وكانت وش الخير ليا طبعا الحمد لله ، وسجلها هدف الكابتن عماد متعب

 

 

** ايه رأيك في الكلام اللي بيقول ان غياب احمد فتحي صعب اي حد يعوضه ؟

*الكابتن احمد فتحي لاعب عندة خبرات كتير جدا ومؤثر في الملعب ويصعب حاليا الوصول للمستوي الفني العالي اللي وصلو كابتن احمد ،وده طبعا مع كامل احترامي الشديد له ،بعد ذهابه عن الفريق هبذل كل جهدي طبعا عشان جمهورنا ميحسش بغيابة ،وبوعد جمهور الاهلي علي المزيد من العطاء لهم من اجتهاد وجدية وإسرار وعزيمة علي الفوز في كل لقاء بإذن الله ،وتمنياتي للكابتن احمد فتحي المزيد من الالقاب والتوفيق في استكمال مسيرته القادمة

احترامي الكامل للكابتن احمد

 

 

** مين اللاعب اللي مشي من الاهلي ومحمد هاني حاسس بغيابه في الملعب ؟

*كل لاعب ترك الاهلي غايب عني ولكن البديل افضل

 

 

** مين اللاعب اللي كنت تتمني تلعب معاه ؟

*الكابتن محمد ابو تريكة والكابتن محمد بركات

 

 

** مين المدرب اللي محمد هاني مدين له بالفضل ؟

*الكابتن محمد يوسف طبعا

 

 

** افضل مدرب اجنبي اتدربت معاه ؟

*الساحر طبعا ” مانويل جوزيه ”

 

 

** رغم الانقاذ الرائع في ماتش الاتحاد اللي فات الا ان محمد هاني ارتكب بعض الاخطاء زي الكورة اللي رجعتها الشناوي ولولا خروجه كانت هاتسبب مشكلة للاهلي .. تحب تقول ايه !

*الكابتن محمد الشناوي حصن الامان للفريق ومش بقلق خالص لو اخطأت امامة في كورة ، بكون مطمن  بوجودة خلفي انه قد المسؤلية ،

 

 

** شايف الاهلي تحت قيادة فايلر قادرة علي انتزاع لقب ابطال افريقيا ؟

*فايلر من المدربين المميزين جدا ،وعنده عزيمة وارادة بيوجهها لينا قبل كل لقاء ان الهدف الرئيسي هو عودة اللقب من جديد وان شاء الله قادرين علي عودته مرة اخري للنادي

 

 

** أيه أصعب مباراة لعبها محمد هاني ؟ و ايه المباراة اللي كنت بتتمني تلعبها ولكن تم استبعادك ؟

*اصعب مباراه هيا مباراة الترجي الاخيرة

وكنت اتمني اشارك في مباراه الوداد

 

 

** مبروك علي الدوري رقم 42 للاهلي ؟

ممكن نعرف محمد هاني حصل كام لقب دوري مع الاهلي و ايه البطولات التانية ؟

*3 دوري و2 افريقيا و2 سوبر و1 سوبر افريقي

 

 

** رسالة محمد هاني حابب يوجهها لمين ؟ وتقول فيها أيه ؟

*كابتن مؤمن زكريا وحشتنا ومستنين وجودك تاني ،ياارب يكمل شفائك علي خير ،وبهدي الدوري ليه طبعا وان شاء الله افريقيا

 

 

** هاخد رأيك في بعض الأسماء

(1)مروان محسن

*كابتن كبير لكن السوشيال ميديا ليها تأثير عليه اتمني ميتجهش للي فيها ويركز اكتر .. انت لاعب موهوب وقيمة كبيرة للاهلي والمنتخب

(2)محمد مجدي أفشة

*من اللاعبين المهمين جدا ويصعب التحدي امامة في الملعب واضافة في وقتها للفريق

(3)عمرو السولية

*حصن امان خط وسط الاهلي واتمني العودة سريعا له

(4) محمود كهربا

*اضافة جيدة للفريق وترقبو جبهة من ناار عند استمرار مشاركته في المباريات

(5) أليو بادجي

*لاعب مؤثر ومتسرع احيانا ولكن اضافة قوية في ظل الظروف الحالية لمروان وذهاب ازارو

(6) علي معلول

*المصري وليس التونسي انا شايفة كدة

 

 

** علي المستوي الشخصي انا بحبك جدا با كابتن ..وشايف انك هاتبقا افضل باك يمين في مصر

ويكفي تواضعك واحترامك واخلاقك ، انت مش بس مستقبل الاهلي انت مستقبل منتخب مصر ..وان شاء الله هاتاخد حقك كله في المستقبل

*متشكر جدا لحضرتك كنت سعيد معاك

 

 

** آخر حاجة .. لو جالك عرض مالي كبير في نادي كبير ..رد هاني أيه ؟

*الاهلي البيت الكبير ومافيش بيت اكبر في مصر للانتقال إليه ،ولكن عند الاحتراف خارج مصر اتمني الدوري الانكليزي

 

 

** بمناسبة الدوري الانجليزي .. تقول ايه عن صلاح ؟

*استمر ولا داعي للتفكير خارجا في الوقت الحالي

 

 

خالص تحياتي قسم اليوم الخامس الرياضي لنجم الأهلي وجناحه الطائر الكابتن محمد هاني بالتوفيق مع الأهلي ومنتخب مصر .

 

 

الوسوم
اظهر المزيد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى
إغلاق
إغلاق