حوار

مراد فكري .. ” حلمي ” في اللعبة الأخيرة .. الأقرب ليا .. وبقول للصحافة بلاش تركزوا علي ” حمو بيكا “

حوار / شيماء عيسى جبر
مراد فكري إحدى الشخصيات متعددة المواهب، ، والذي وضع أولي خطواته الفنية في مسلسل الرقص مع الزهور ، ليثب أقدامه في عالم الفن ، ويثبت للجميع أنه فنان مميز ، وفي هذا الحوار ترصد لكم اليوم الخامس أهم المحطات الفنية في مسيرة الفنان مراد فكري .
** بدايةً عايزين نرجع شوية معاك فى التمثيل للبداية التي عهدناها من خلال مسلسل ” إمام الدعاة ” أمام الفنان الكبير حسن يوسف .. احكيلنا البداية دي جات أزاى ؟
• والله هى البداية كانت قبل إمام الدعاة كان مسلسل اسمه” الرقص مع الزهور ” ودا كان مع الفنانة دنيا سمير غانم وكان بيتناول مشكلة أولاد الشوارع إنتاج قطاع الإنتاج تأليف السيد راضى
و العمل التانى كان اسمه ” بابا فى تانية رابع ” كان بيلقى الضوء على مشاكل الدروس الخصوصية ، بعدين عملت مسلسل قاسم أمين مع إنعام محمد على وبعدين مسلسلين مع الأستاذ خيري بشارة ” الفريسة ” والصياد ” ، و ” مسألة مبدأ ” أمام إلهام شاهين دى كانت البداية بالنسبة للتلفزيون
أما السينما كان فيلم” مجنون أميرة ” مع المخرجة إيناس الدغيدى ، وبعدين فيلم الألماني مع النجم محمد رمضان دى كانت بداية السينما
** أكيد لكل ممثل من الأدوار اللي بيقدمها دور بيسيب بصمة فيه شخصيا ….. إيه اكتر شخصية سابت فيك بصمة (هل دور صرصار فى مسلسل إبن حلال ،او دور إيكا فى فيلم الالمانى خصوصا أنها بقت تريند ع السوشيال ميديا ؟
• انا كل الشخصيات اللي بقدمها بحبها وبحترمها لأنها نتاج لتعبى وشغلى وشقايا بس أكتر شخصية قريبة منى شخصية “حلمى” فى فيلم اللعبة الاخيرة
** ده السؤال إللى كنت هاسأله لحضرتك … أنت قولت الدور إللى لعبته فى فيلم اللعبة الأخيرة من أحلى الأدوار إللى قدمتها والقريبة لقلبى .. نحب نعرف من حضرتك ليه ؟ وهل يا ترى فيها حاجة قريبة من شخصية مراد فكرى الإنسان ؟
• لأنها برا الصندوق وكل الأدوار إللى لعبتها حاطت “#مراد فكرى ” فى إطار معين متشابه :لكن شخصية حلمى لها بعد سيكولوجى هو الجديد فى الحكاية ، وأخدت عليه أحسن ممثل فى المركز الكاثوليكى وتعتبر اول جايزة أخدتها على التمثيل
** كلمنى عن شخصية حريقه في مسلسل #أولاد إمبابة والجايزة اللي اخدتها عن استفتاء الجمهور في أفضل الأدوار الكوميديا ؟
• الحمدلله أخدت جايزة استفتاء الجمهور عن طريق مجلة #وشوشة عن أفضل الأدوار الكوميدية ،وشخصية حريقه انا برجع بيها للكوميدي بعد فيلم الألماني عملت من بعده فيلم عمر الأزرق كان شوية كوميدى لكن مجموعة الأعمال بعد كدة كانت شوية جد
شخصية حريقة كانت مفاجأه للناس وليا أنا شخصياً ، وده شجعنى إني ألعب كوميدى بعد كده
** كلمنى عن برنامجك الجديد “#مش زى الباقي ” اللي ها تقدم من خلاله شخصية كسبرة ؟
• ” #مش زى الباقي ” فكرة جديدة خالص برا الصندوق إخراج إيهاب عبد اللطيف ، وها يتعرض على قنوات النيل المتخصصة وها يتقدم في 8 حلقات منفصلة بطولة أيمن قنديل،وفاروق شيبا ، و دكتورة سلمى كمال،و دكتور غفران محمود،و تأليف محمود السنطى ، وهى من الحاجات اللي بتجمع بين البرنامج والدراما مع بعض بس في إطار جميل لايف كوميدي
** مسلسل #مزاد الشر ” و شخصية حمدان… عايزين نعرف منك الكواليس الخاصة بالعمل ؟
• مسلسل مزاد الشر كان المفروض يتعرض في رمضان اللي فات لكن ظروف بعض الممثلين وكورونا اضطرينا نأجل، لكن المفروض ها نبدأ فيه تصوير كمان خمسة أيام و ها نصور فى استوديوهات أشرف عبد الباقى، تأليف عبد المنعم طه وإخراج ممدوح زكى
** أيه هو العمل اللي أنت قدمته و شايفه انطلاقة لمراد فكرى ؟
كل عمل أنا قدمته سواء الدور كان كبير أو صغير بالنسبة ليا انطلاقه وله طعمه وبصمته الخاصة بيه
** أيه رأيك في السوشيال ميديا بشكل مبدأي .. وإيه علاقتك بيها ؟وهل السوشيال ميديا بتلعب دور فعال فى هبوط الفنان أو صعوده؟
• طبعا أكيد السوشيال ميديا لها دور كبير وفعال أووى فى معرفة وانتشار الفنان ، وعلاقتي بيها مش قوية ومش سطحية ممكن أتعامل مع الناس من خلال صفحتي على فيسبوك او إنستجرام ومليش تيك توك، لكن مش منقطع وهى حلقة تواصل بين الفنان والجمهور ، لكن من حق الفنان يكون له حتة خصوصية كده ومتبقاش حياته كلها مفتوحة وده اللي بيميز كل فنان عن التانى
** مين من الفنانين اللي كنت تتمنى تشتغل معاهم ؟
• اكيد الفنان الكبير #عادل إمام ” والراحل العظيم ملك الكوميديا#سمير غانم ” ، بس محصلش نصيب بس اشتغلت مع دنيا سمير غانم و إيمي سمير غانم وحسن الرداد
** أكيد من غير الطموح بينفذ الشغف…. شايف فين مراد فكرى بعد 5 سنين ؟ وأيه هي أحلامك الفنية ؟
• ياااه يا مين يعيش، لكن ممكن أكون شايف مراد دلوقتي أفضل من الفترة اللي فاتت والفترة اللي قبلها يعنى في تقدم فني ملحوظ ، لكن الفترة اللي جاية بأيد ربنا.. بس بتمني الأفضل طبعا
** اية الرسالة اللي تحب توجهها للصحافة عموما ؟ وهل علاقتك بالصحافة علاقة قوية ؟
• معظمكم أصدقائي وعلاقتي بيكم جيدة ، وبقول أنتو السلطة الرابعة فى مصر ، أنتو إللى بتوصلولنا المعلومة بشكل صح ، فياريت يكون تركيزكم على الحاجات الإيجابية، و بلاش يبقا كل التركيز على #حمو بيكا والفساتين القصيرة والمهرجانات
وخليكم دايما في صميم الصح ، وواجب الصحافة من وجهة نظري إنها مسئولة عن الشعب المصري زيها زى أي سلطة موجودة
وفي نهاية لقاءنا مع الفنان مراد فكري توجهنا له .. بشكرك باسم اليوم الخامس وأتمنى ليك مزيد من التألق والنجاح ونشوفك داًئما في أعمال مميزة .
تعليقان
أعجبني

تعليق

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى