الشعر

مشاعر من وحى اكتوبر المجيد

نظم / عماد عزيز

ذكريات اليوم وبكرة
لسة فاكره
يوم ما علم العزة رفرف عالحدود
ألف هامة وهامة تعلى
يوم ما حلينا القيود
يوم ما نادوا الله أكبر
يوم ما صوت الفرحة هلل
فتحت كل السدود
عشتي يا ام الملحمة
وعاش ولاد مصر الأسود
ذكريات اليوم وبكرة صوتها عالي
يوم ما ابنك خد سلاحه
ولم حاله
وقال يسيل بالفخر دمى
ولا حد يتخطى الحدود
يا مصر يا ام الفَرَحْ
يا ام الشهامة والكرامة والزعامة
تفضلي حرة بسلامة
واللي هاب صوتك يعود
يا ذكرى النصر والفرحة
عيدانك في السنين طارحة
يا لابسة التاج مع الطرحة
نتوّجها – عروسة بزيها المشهود
أحمر بلون دم اللى متستر
بجوع الليل
أحمر بلون الطرطشة على كل دبابة عدو
وملونة الهلاهيل
وابيض بلون الفرحة يتغنى مع المواويل
ابيض بلون الضي
طارح ع السكك ومغطى ع القناديل
واسود بلون طينك – وخيرك
لو قالولي ألف ميت مليون بلد
غيرك – يا مصر ما تسوى
ولا يسوى كنوز الدنيا – نقطة ميه من نيلك
يا أم النيل
ذكريات النصر طاله بفخرها
على كل جيل
كل ذكرى يا مصر وانتى الطيبة
كل ذكرى يا مصر وانتى قريبة
من كل مادد ليكي ايد
اللى عاش جواكى لحظة
يفتخر بحياة ولادك
اللى ما خلفوا الوعود
واللي شافك شاف حلاوة روح جدودك
شاف ملايين الجدود
شافها في النيل والهرم
شافها مع رفعة علم
فوق المدارس والمصانع
والبيوت
ذكريات اليوم وبكرة لسة فاكره
لسة فاكره
والامل ممدود


———

6اكتوبر 2021

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

زر الذهاب إلى الأعلى